Edon Zhegrova, një nga futbollistët më të talentuar të Kosovës, është shumë pranë largimit nga Lille gjatë kësaj vere.
Interesimi për anësorin 26-vjeçar po rritet dita-ditës, me Napolin, Atalantën dhe Fenerbahçen që tashmë janë në garë, ndërsa së fundmi është përmendur edhe emri i klubit nga Premier League, Everton.
Sipas medieve britanike, Evertoni e pëlqen shumë stilin e lojës së Zhegrovës, veçanërisht për depërtimet nga krahu dhe kreativitetin në sulm, por ende nuk ka bërë ofertë zyrtare. Lille është e hapur për shitjen e tij dhe ka vendosur çmimin prej 25 milionë euro.
Zhegrova, i cili ka kontratë me klubin francez deri në verën e vitit 2026, është rikthyer në stërvitje me Lille pas një mungese të gjatë prej më shumë se gjashtë muajsh, për shkak të një lëndimi që e mbajti jashtë fushës.
Në sezonin e fundit, pavarësisht mungesës, ai arriti të regjistrojë 8 gola dhe 2 asistime në 21 ndeshje, duke konfirmuar vlerën e tij si një futbollist vendimtar.
Largimi i tij është konfirmuar edhe nga presidenti i Lille, Olivier Letang.
“Edoni ka shprehur dëshirën për t’u larguar. Nuk më duket e përshtatshme ta mbajmë me një vit të mbetur në kontratë. Presim largimin”, ka thënë pak ditë më parë Letang.
Zhegrova tani është përballë një hapi të madh në karrierën e tij, dhe ditët në vijim pritet të jenë vendimtare për të ardhmen e tij./rtk live/