Mes spekulimeve të shumta për një kalim të mundshëm te Milani, drejtori sportiv i Bayer Leverkusen, Simon Rolfes, ka sqaruar situatën e Granit Xhakës, duke hedhur poshtë çdo zë për një largim të mesfushorit shqiptar.
“Ne mbetemi të përqendruar te faktet. Ndonjëherë kjo ndihmon në botën e sotme. Janë bërë shumë spekulime për një kalim të supozuar te Milani, por nuk ka pasur asnjë negociatë. Pas ndeshjes së fundit të sezonit në Mainz i thashë Granitit se mbetet një lojtar i rëndësishëm për ne. Kjo qasje e jona nuk ka ndryshuar”, ka thënë Rolefs për “Kölner Stadt-Anzeiger”, raporton RTKLive.
Granit Xhaka konsiderohet një nga mesfushorët më të kompletuar në futbollin evropian. I njohur për vizionin e lojës, pasimet e sakta në distancë dhe goditjet e fuqishme, ai ka pasur një karrierë të pasur dhe të qëndrueshme.
Ai nisi karrierën te Baseli, ku fitoi dy tituj kampion dhe një Kupë të Zvicrës. Më pas u transferua te Borussia Mönchengladbach, duke u bërë një emër i rëndësishëm në Bundesliga. Në vitin 2016 kaloi te Arsenali, ku në shtatë vite luajti 373 ndeshje, shënoi 23 gola dhe fitoi dy FA Cup dhe dy Community Shield, duke mbajtur edhe shiritin e kapitenit.
Në vitin 2023, Xhaka u rikthye në Gjermani me Bayer Leverkusen, ku u bë menjëherë lider dhe ndihmoi ekipin të fitonte kampionatin gjerman për herë të parë në histori në sezonin 2023–2024.
Ai është gjithashtu kapiten i kombëtares së Zvicrës, me mbi 130 paraqitje.
Për momentin, të gjitha sinjalet tregojnë se Xhaka do të mbetet pjesë e projektit të Leverkusenit./Rtk.live/