Milani vazhdon intensivisht rindërtimin e mesfushës së tij, një proces që nisi pas shitjes së Tijjani Reijnders te Manchester City dhe që tashmë ka hyrë në një fazë mjaft dinamike..
Edhe pse afati kalimtar i kësaj verë ende është ende në ditët e para, drejtori sportiv Igli Tare po vepron me vendosmëri për t’i garantuar trajnerit Massimiliano Allegri një repart mesfushe të balancuar dhe me cilësi të lartë.
Pas mbërritjes me parametra zero të Luka Modric dhe përfundimit të marrëveshjes me Torinon për Samuele Riçin, Milani nuk e ka ndërmend të ndalet.
Pista të tjera mbeten ende të hapura: Javi Guerra i Valencias dhe Granit Xhaka i Bayer Leverkusenit janë në listën e interesit, por emri që po fiton gjithnjë e më shumë terren është ai i Ardon Jasharit.
Në orët e fundit janë zhvilluar kontakte të drejtpërdrejta midis Igli Tares dhe drejtuesve të Club Brugge, skuadra ku luan aktualisht mesfushori shqiptar.
Në këtë takim, Tare ka kërkuar të kuptojë nëse klubi belg është i gatshëm të ulë kërkesën prej 40 milionë eurosh (mes pjesës fikse dhe bonuseve), ndërsa nga ana tjetër, vetë Jashari ka dhënë dritën jeshile për transferimin drejt “San Siros”.
Dëshira e lojtarit për t’u bashkuar me Milanin tashmë është komunikuar, gjë që mund të ndikojë në uljen e çmimit dhe përshpejtimin e negociatave.
Synimi i Tares është të përmbyllë sa më shpejt këtë operacion, për t’ia dorëzuar Allegrit një mesfushë të kompletuar përpara fazës përgatitore.
Milani është në lëvizje dhe sinjalet janë të qarta: kuqezinjtë nuk po ndërtojnë vetëm për sot, por për të ardhmen./Gazeta Metro/