Administrata e presidentit amerikan Donald Trump ka diskutuar me aktorë rajonalë dhe ndërkombëtarë mundësinë e një marrëveshjeje të re me Iranin, që do të mundësonte qasjen e këtij të fundit në 20-30 miliardë dollarë investime për një program bërthamor civil, raportoi CNN, duke cituar katër burime të informuara për procesin, shkruan Gazeta Sinjali.
Ky plan, i cili ka për qëllim rikthimin e Iranit në tryezën e negociatave pas konflikteve të fundit me Izraelin, përfshin lehtësimin e sanksioneve dhe mundësinë e lirimit të miliarda dollarëve nga fondet e bllokuara iraniane.
Diskutimet kanë vazhduar edhe këtë javë pas marrëveshjes së armëpushimit, ndërsa propozimet përfshijnë një kusht të panegociueshëm: “pasurim zero të uraniumit nga Irani”, që përbën një nga pikat më të debatueshme të çdo marrëveshjeje të mundshme.
Sipas burimeve të CNN, një version paraprak i planit u diskutua në një takim të fshehtë disa orësh të mbajtur në Shtëpinë e Bardhë, të premten para sulmeve ajrore amerikane ndaj Iranit. Në takim mori pjesë i dërguari i posaçëm amerikan Steve Witkoff dhe përfaqësues të partnerëve nga Gjiri.
Një zyrtar amerikan sqaroi se fondet për këtë program nuk do të vinin drejtpërdrejt nga SHBA-ja, por pritej që partnerët arabë të mbulonin pjesën më të madhe të investimeve. Objektivi është ndërtimi i një programi të kontrolluar për prodhimin e energjisë bërthamore për përdorim civil – pa kapacitete për pasurim uraniumi../Gazeta Sinjali/