Sulmuesi i Barcelonës, Robert Lewandowski, ka njoftuar të dielën se do të refuzojë të luajë për Kombëtaren e Polonisë për aq kohë sa trajneri aktual, Michal Probierz, të jetë në krye të ekipit.
Tridhjetë e gjashtë vjeçari, i cili ka zhvilluar 158 ndeshje dhe ka shënuar tetëdhjetë e pesë gola me fanellën e Polonisë, së fundmi është zëvendësuar si kapiten i ekipit kombëtar nga Piotr Zielinski.
“Duke marrë parasysh rrethanat dhe humbjen e besimit ndaj trajnerit, kam vendosur të tërhiqem nga Kombëtarja e Polonisë për aq kohë sa ai të jetë trajner”, ka shkruar Lewandowski në platformën X.
Megjithatë, ish-sulmuesi i Bayern Munich nuk e ka mbyllur përfundimisht derën për një rikthim.
“Shpresoj që do ta kem përsëri një mundësi për të luajtur për tifozët më të mirë në botë”, ka thënë ai.
Michal Probierz është trajner i Polonisë që nga viti 2023 dhe arriti ta kualifikojë ekipin në Euro 2024, por përfaqësuesja polake ishte eliminuar që në fazën e grupeve./Rtk.live/