Shkruan Zymer Mehani
Sot, më 3 qershor, kujtojmë me mall e krenari lindjen e një burri të rrallë — prof. Selim Berisha, një ndër bijtë më të ndritur që i ka dhënë toka shqiptare, një vigan i dijes dhe një dëshmor i lirisë. Në këtë datë, nuk kujtojmë vetëm lindjen e një njeriu, por të një ideali që u mishërua në trupin e një atdhetari të paepur.
I pajisur me urtësinë e një mendimtari dhe guximin e një luftëtari, profesor Selimi nuk e ndau kurrë librin nga pushka, as auditorin nga atdheu. Fjala e tij ndërgjegjësonte, ndërsa veprimi i tij trimëronte. Ishte një njeri që nuk fliste për lirinë, por e jetonte atë me çdo hap, deri në flijim.
Ai ra për të mos vdekur kurrë. Në vend të heshtjes, la jehonën e emrit të tij në zemrat tona. Në vend të mungesës, la një kujtim të epërjetshëm në mbamendjen kombëtare. Në vend të një varri, la një altar përkushtimi, ku secili prej nesh përkulet me nderim.
Në këtë ditëlindje, ne nuk ndezim vetëm qirinj kujtese, por dritë vetëdijeje për ta jetuar jetën me dinjitet, me guxim e me dashuri për tokën ku ai derdhi gjakun.
Lavdi e përjetshme emrit të tij!
Qoftë i pavdekshëm kujtimi dhe amaneti i Prof. Selim Berishës!