Një plumb në kokë i mori jetën 22-vjeçarit Gëzim Sinomataj, mbrëmjen e së dielës në Vlorë. I riu dyshohet se u qëllua me snajper nga një ndërtesë përballë pallatit ku ai jetonte. Ngjarja e rëndë ndodhi rreth orës 22:00 në lagjen “Hajro Çakërri
22-vjeçari Sinomataj kishte dalë në ballkonin e shtëpisë së tij në katin e tretë për të pirë cigare, kur u qëllua për vdekje. Vrasja e të riut dyshohet të jetë e mirëorganizuar. Pas ngjarjes, autorët u larguan me një makinë BMW, e cila rreth 1 orë më pas u gjet duke u djegur në lagjen “24 Maji”.
Mbetet e paqartë nëse hetuesit kanë arritur të gjejnë të dhëna të cilat mund t’i ndihmojnë në identifikimin e autorëve të kësaj ngjarjeje të rëndë. Deri në këto momente në polici mësohet se janë shoqëruar të paktën 10 persona.
Siç raporton gazetarja e Klan News, Pamela Dhimaj, 22-vjeçari Sinomataj jetonte në Belgjikë dhe ishte kthyer për të kaluar vitin e ri në vendlindje. Po sipas gazetares, 22-vjeçari ishte djali i Sokol Sinomatajt, i njohur si ‘buzëderri’, ish-anëtar i bandës së Gaxhait në vitin 1997 në Vlorë, i cili është arrestuar për vrasjen e një personi në vitin 2000. Ndërsa dy vite më parë, xhaxhai të tij, Bernard Sinomatajt në të njëjtën zonë ku ndodhi vrasja e një nate më parë iu bë atentat me tritol./tvklan.al
