Trajneri i Real Madrid, Carlo Ancelotti, ka hedhur poshtë spekulimet për largim nga klubi në fund të sezonit, duke theksuar se, pavarësisht eliminimit nga Champions League dhe pozitës së dytë në La Liga, mbetet i përkushtuar dhe i motivuar për sfidat që e presin në vazhdim.
Pas humbjes ndaj Arsenal, janë shtuar raportimet se italiani mund të marrë drejtimin e Kombëtares së Brazilit, ndërsa në listën e pasardhësve të mundshëm janë përmendur Xabi Alonso i Bayer Leverkusen dhe Jurgen Klopp, ish-trajner i Liverpool.
“Klubi e di që ka qenë një vit më i ndërlikuar se i kaluari. Sfidat i menaxhojmë bashkë. Muaji i mjaltit vazhdon. Jam shumë i lumtur, edhe pse nën presion, por gjithmonë ka qenë kështu,” është shprehur Ancelotti në konferencë për shtyp të martën.
Trajneri italian ka shtuar se nuk e sheh presionin si problem: “Kur je afër suksesit, stresi rritet, por për mua stresi është si karburant. Më jep energji për të menduar më shumë. Përderisa zgjohem në mëngjes, çdo gjë është në rregull”, ka thënë ai.
Real Madrid aktualisht renditet në vendin e dytë në La Liga me 69 pikë pas 32 xhirove, katër më pak se lideri Barcelona. Të dielën përballen në finalen e Kupës së Mbretit, por më parë, madrilenët do të luajnë të mërkurën kundër Getafe në kampionat.
Ancelotti konfirmoi se dy lojtarë kyç, Kylian Mbappe dhe Ferland Mendy, nuk do të jenë të gatshëm për këtë ndeshje. “Nuk janë gati për nesër, por do të stërviten gjatë këtyre ditëve dhe besoj se të dy do të jenë në dispozicion për ndeshjen e së shtunës”, ka thënë ai.
Sa i përket formacionit, Ancelotti ka thënë se do ta përcaktojë bazuar në gjendjen fizike të lojtarëve. “Disa janë ende të lodhur, gjë krejtësisht normale. Getafe luan me intensitet dhe është skuadër e organizuar. Jemi gati dhe të përgatitur, ndeshjet bëhen gjithnjë e më të rëndësishme sa më shumë që afrohet fundi i sezonit”, ka thënë ai. /RTK