Trajneri i Paris Saint-Germain, Luis Enrique, ka refuzuar ta pranojë se ekipi i tij ishte favorit para ndeshjes së parë të çerekfinaleve të Champions League kundër Aston Villës, e cila do të zhvillohet të mërkurën në kryeqytetin francez.
Gjatë një konference për shtyp të martën, Enrique ka thënë se në futboll favoritët nuk ekzistojnë. “Kundër Liverpool bastorët thanë se nuk kishim shans. Në futboll, favoritët nuk ekzistojnë. Ka tetë ekipe që janë në çerekfinale sepse e meritojnë këtë. Ne do të duhet të bëjmë atë që duhet dhe të tregojmë se e meritojmë fitoren në fushën e lojës”, ka thënë ai.
Trajneri i Aston Villas, Unai Emery, i cili ishte trajner i PSG-së nga viti 2016 deri në 2018, do të rikthehet në “Parc des Princes” për këtë ndeshje, ndërsa tekniku spanjoll ka thënë fjalë të mira për të.
“Është një trajner i shkëlqyer”, ka thënë Luis Enrique për Emery. “Aston Villa është një ekip i shkëlqyer. Ata avancuan në dy vitet e fundit falë Unai Emery. Aston Villa është një ekip që na ngjan, me shumë lojtarë të përshtatshëm për pozita të ndryshme. Është e vështirë të dihet kush do të luajë, veçanërisht pas transferimeve të dimrit, ku ata janë përforcuar në një mënyrë të shkëlqyer. Do të jetë një ndeshje e hapur dhe e vështirë për të dyja ekipet”.
Pavarësisht ngarkesës pas triumfit të PSG-së në titullin e trembëdhjetë të Ligue 1, Enrique është i sigurt se lojtarët e tij do të ruajnë fokusin e duhur për këtë përballje të rëndësishme evropiane./Rtklive.com/