Shqiptari me inicialet B.I., nga Warburton Road, Twickenham, sulmoi viktimën në Ascot High Street në orët e para të 28 janarit të vitit 2018, shkruante një gazetë britanike në muajin maj të vitit 2019. Fjala ishte për të dyshuarin për vrasjen në Skënderaj, shkruan Gazeta Metro. Sipas burimeve të Metros, i dyshuari është kthyer për të jetuar në Kosovë viteve të fundit.
27-vjeçari u shpall fajtor nga një juri pas një procesi gjyqësor në Reading, i cili përfundoi më 8 mars 2019. Ai ishte dënuar me dy vjet burg për këtë sulm.
Më pas ai u dënua në të njëjtën gjykatë dhe iu urdhërua të paguajë një kompensim prej më shumë se 1 mijë eurosh për veprën penale të shkaktimit të lëndimeve të rënda trupore.
Rreth orës 2:55 të mëngjesit, ai kishte goditur në mënyrë të përsëritur me grushte një burrë në të 20-at, derisa një grua kishte ndërhyrë guximshëm duke përdorur trupin e saj për të mbrojtur viktimën nga sulmet e mëtejshme.
Viktima kishte pësuar thyerje në fytyrë.
B.I, i cili u akuzua më 14 korrik 2018, u ndalua nga stafi i sigurisë së një klubi në Ascot High Street, ku më pas u arrestua nga oficerët e policisë.
Detektivi Chris Jamieson, nga Njësia e Hetimeve Kriminale e bazuar në stacionin policor të Maidenhead, tha: “Policia e Thames Valley nuk do të tolerojë ata që synojnë të kryejnë sulme të dhunshme dhe të paprovokuara ndaj anëtarëve të tjerë të publikut.
“Shpresoj që dënimi dhe shpallja fajtor e tij t’i sjellë një farë qetësie viktimës që u sulmua dhe pësoi lëndime të rënda.
“Dëshiroj gjithashtu të falënderoj viktimën për mbështetjen e tij gjatë hetimit tonë”, raportonin mediat britanike. /gazetametro.net