Një 28-vjeçar afgan është arrestuar pas një sulmi me thikë në një park në qytetin Aschaffenburg të Gjermanisë, ku u vranë dy persona, përfshirë një fëmijë të vogël. Kancelari Olaf Scholz e dënoi ngjarjen si një “akt terrori” dhe kërkoi që autoritetet të sqarojnë pse autori ndodhej ende në Gjermani.
Policia raportoi se një djalë dyvjeçar dhe një 41-vjeçar, që përpiqej ta ndihmonte, humbën jetën. Dy viktima të tjera mbetën të plagosura rëndë. Sulmuesi, që jetonte në një qendër azilantësh në zonë, dyshohet se kishte probleme psikologjike dhe motivi i tij ende nuk është i qartë. Sipas mediave lokale, sulmi kishte si objektiv një grup fëmijësh nga një çerdhe.
Ngjarja ndodhi në prag të zgjedhjeve të parakohshme në 23 shkurt, ku emigracioni dhe politika e azilit janë çështje kyçe. Friedrich Merz, kryetar i CDU-së dhe favorit për zgjedhje, e dënoi dhunën, duke kërkuar rikthimin e rendit dhe ligjit. Ndërkohë, Alice Weidel, bashkëkryetare e partisë së ekstremit të djathtë AfD, kërkoi “rikthim masiv” të emigrantëve.
Treni në Aschaffenburg u ndal përkohësisht ndërsa sulmuesi tentoi të arratisej, por u arrestua shpejt nga policia. Scholz e quajti sulmin një akt të pashpjegueshëm dhe kërkoi masa të menjëhershme. Markus Söder, kryeministër i Bavarisë, e dënoi ngjarjen si një akt “të ulët dhe të turpshëm”.
Ngjarja, pjesë e një serie sulmesh të dhunshme në Gjermani, ka nxitur thirrje për masa të ashpra sigurie në prag të zgjedhjeve. Autoritetet po hetojnë nëse sulmuesi kishte bashkëpunëtorë, por deri tani nuk ka indikacione për këtë./Gazeta Metro/