Thriller në kryendeshjen e kësaj jave të La Liga-s, Barcelona-Atletico Madrid. Miqtë nga kryeqyteti kanë përmbysur disavantazhin e minutës së 30-të, fiksuar nga goli i Pedrit, në një mënyrë sa dramatike, aq edhe të pabesueshme.
De Paul ka barazuar shifrat në minutën e 60-të, ndërsa në “frymën e fundit”, kur pritej vetëm vërshëllima e kryesorit, i futuri si zëvendësues, Sørloth, ka shënuar golin e fitores për mysafirët. Volum i madh loje, kontroll i padiskutueshëm i topit, disa raste të arta për finalizim, por asnjë pikë për katalanasit.
Ndoshta ishte ndëshkim i padrejtë për atë që prodhoi skuadra e Flick (i cili mungoi në stol, për shkak pezullimi) në fushën e blertë, përballë një kundërshtari që u mbrojt fort dhe doli me kundërsulm.
Duhet kujtuar se goli i barazimit (1-1) nga De Paul erdhi si “dhuratë” e gafës së Casado. Minutat më pas ishin një dialog i gjatë mes sulmeve të panumërta katalanase, por që nuk kishin finalizimin e duhur, edhe për mëeritë të portierit kundërshtar.
Minuta e fundit shtesë, e gjashta, solli edhe ndëshkimin e rëndë dhe të pamerituar të Barcelonës. Sorloth shënoi golin e fitores për madridasit, duke çuar dëm tërë atë lojë të vendësve.
Diego Simeone më në fund gjen fitoren e parë në karrierën si trajner në fushën e Barcelonës. Kreu i La Liga-s është për të tijtë, që dalin nga kjo transfertë me tri pikë të pabesueshme.