Pas sulmit të mbrëmshëm në Zubin Potok ndaj kanalit të ujit Ibër-Lepenc, sot janë ndërmarrë veprime nga Policia e Kosovës në dhjetë lokacione të ndryshme në veriun e vendit, njoftoi ministri i Brendshëm, Xhelal Sveçla, në një konferencë për shtyp, shkruan Gazeta Metro
Sveçla mbajti konferencë të jashtëzakonshme sonte bashkë me drejtorin e përgjithshëm të Policisë, Gazmend Hoxha, ku njoftoi për më të rejat rreth sulmit të mbrëmshëm në veri.
“Pas hetimeve intensive të hetusve policorë, sot në orët e mëngjesit në dhjetë lokacionë në veri të vendit janë realizuar kontrolle me ç’rast janë arrestuar të shoqëruar në stacione policore tetë persona të dyshuar mbi dyshimin për përfshirje në veprime kriminale e terroriste”, tha për media ministri Xhelal Sveçla.
Më tej, ai tha se sulmi i mbrëmshëm është i dirigjuar nga Beogradi dhe se është kryer nga një grup profesionist i veprimeve të tilla që për cak kanë pasur infrastrukturën kritike të Kosovës.
Sulmi i mbrëmshëm në Ibër-Lepenc ka ngjallur reagime të ashpra nga bashkësia ndërkombëtare, duke e dënuar sulmin të cilin e cilësuan si terrorist dhe akt sabotazhi./gazetametro.net